我叫个部长过嚟，谂住同佢讲清楚碟菜里面居然加咗“料”，我强调呢碟要退钱，如果唔係叫人点食啊？点知个部长居然一啖吞咗只乌蝇，仲笑笑口噉讲：“小姐，可能你冇睇清楚嗻，係豆豉嚟嘅，我都食得落肚。嗱，依家碟菜干净晒嘞！”啊？唔係啩，居然讲大话都唔眨眼？好，等你咁狡猾吖嗱，你有张梁计我都有过墙梯。“唔好意思喔部长，头先我喺你未食只乌蝇之前，已经用手机影低咗做证据口架嘞，所以你今日食呢只嘢就白食嘞。如果你唔惊我去消委会投诉嘅话，咪即管收我哋钱啰，我到时带埋发票同影低张相去，睇下你哋酒楼仲点开门做生意！”
个部长听完之后，激到眼都凸埋，即时呆晒，但对我哋嘅态度就１８０度大转弯，“哦，係咩？真係乌蝇啊？噉我咪当大菌食细菌，细菌当补品啰。真係唔好意思喔，我即刻叫人送过碟新鲜嘅畀你哋，今晚你哋餐饭仲可以全单８折添，帮帮手嘞，我头先噉做都係冇心口架！”
唉，厨房一时出错係可以原谅，但今时今日噉嘅服务态度就係时候要改善下嘞，今次就乌蝇当豆豉食，下次如果唔小心有甴曱，咪要当和味龙虱噉食？
来源: 南方都市报 作者: 何凤仪
