【编者按】喺２００５年嘅中秋节，东山少爷嘅一曲《月光光照羊城》喺网上流传，独特嘅音乐风格，唤醒咗新生代同埋老广州对文化流失嘅关注，即刻掀起咗一股“寻找失落嘅本土文化”嘅热潮。随之推出嘅专辑《唱好广州》得到媒体、大众嘅认同，甚至将佢誉为“一张广州嘅有声名片”。
奥一网讯 上个月，《唱好广州２》面世。喺编曲上边，呢一张风格上比起上一张就多咗一啲时尚嘅题材。呢两张“唱好广州”系列专辑已经构成咗一个整体，反映咗最具广州代表性嘅嘢，大家可以喺里面揾到，“那被遗忘的时光”。为咗向本土文化、本土音乐人致敬，“金曲寻味”特辟专栏，演绎呢十首精彩嘅歌曲，齐齐嚟“唱好广州”。
１．珠玑路晨光
作词：黄毅成 主唱：东山少爷
空气中，檀木释出暗香。三炷香，凝望青烟绕梁。梁上瓦片，在晨光中演岁晚风霜。东处双，那边单的信箱，拉开早已斑驳的趟栊门。门外那间拉肠小档，粥粉多够香。
推阁上的窗，鸡蛋花开小鸟唱。凌晨那端午风雨里，花散落地，引来画眉一双。天气或会变，家的温馨不会变。晨时离别何时归家，亦可喝上，妈妈留的猪踭煲雪耳。
五月嘅清晨，微风。好钟意行喺西关嘅街道小巷，骑楼遮住初夏太阳，眼前明亮。
阳光照喺西关大屋嘅青砖墙上，清风徐来，斑驳摇曳。悠悠踱步，每一个脚步，都携住青石板路嘅厚重历史。喺老西关嘅小街小巷，由长寿至宝华，由多宝转恩宁，再出返珠玑路。偶尔望向趟栊门后，普通西关人家嘅简单生活，就好鲜活噉，一幅幅呈现眼前——
早早起身，装番炷香畀土地公公先。一缕缕嘅青烟袅袅升起，夹杂住婆婆嘅声声祈祷。打开大门，夏日早晨嘅阳光已经铺入老屋。一早起身肚仔饿添，唔怕，拉开趟栊门，着住拖鞋，抓起个兜，就去对面街间拉肠铺买早餐……由细到大啲粥粉面都未变过，一样咁正。
喺楼阁上面推开花窗，楼下嘅鸡蛋花香即刻飘入嚟——係时候执鸡蛋花晒嚟煲凉茶嘞。端午时节雨水多，晚上滴滴细雨，第二朝打开窗，一朵朵白色嘅花已经畀雨打落喺青石板路上。声声雀叫，呢度啲雀，好似一啲都唔惊人噉，同晨运返嚟嘅老伯拎住嘅雀笼里面嘅画眉一唱一和。
细个嘅时候，成日都会喺条街度周围窜，要阿妈大声喺屋度嗌：“食饭嘞！”先至依依不舍噉跑返屋企；大个咗嘞，出嚟做嘢，夜一夜先返到屋企，打开趟栊门，即使屋企人都训晒嘞，黑暗中，都仲可以闻到阿妈煲嘅猪踭煲雪耳嘅味道……
珠玑路晨光，无论隔几远、隔几耐，都一样咁令人魂牵、梦绕。
